SPAK kërkon 14 vite burg për kimistin kolumbian të laboratorit të kokainës në Frakull

Prokuroria e Posaçme (SPAK) ka kërkuar dënimin me 14 vite burg për shtetasin kolumbian Saimir Rosales Rodriguez, i akuzuar si kimisti që do të përpunonte dhe ndante kokainën në laboratorin e zbuluar në Frakull.

Rodriguez po gjykohet në mungesë në Shqipëri, ndërsa pritet ekstradimi i tij nga Kolumbia. Ai u arrestua në shtator të vitit të kaluar nga autoritetet kolumbiane, pas shpalljes në kërkim ndërkombëtar në kuadër të hetimeve për laboratorin e kokainës në Frakull.

Sipas dosjes hetimore, kolumbiani dyshohet se kishte rol kyç në procesin e përpunimit dhe ndarjes së lëndës narkotike në laboratorin që u zbulua gjatë operacionit të autoriteteve shqiptare. Gjykimi ndaj tij vijon, ndërsa SPAK ka paraqitur pretencën për dënimin me 14 vite heqje lirie.