SPANJË – Sánchez: Kam vendosur të shpall zgjedhje të parakohshme për më 29 nëntor

MADRID, 5 tetor /ATSH-ANSA/ – Kam vendosur ta mbledh Këshillin e Ministrave pikërisht sot, për të shpërndarë Parlamentin dhe për të shpallur zgjedhje të parakohshme për datën 29 nëntor, deklaroi kryeministri spanjoll Pedro Sánchez nga Pallati Moncloa.

Mijëra qytetarë dolën në rrugë dje në mbrojtje të së drejtës për strehim. Protestat u shoqëruan me fishkëllima dhe zhurmën e çelësave, tenxhereve dhe tiganëve.

Protestuesit shprehën zemërimin dhe zhgënjimin pas rrëzimit në Kongresin e Deputetëve të dy dekreteve ligjore të miratuara nga qeveria e kryeministrit Pedro Sánchez, të cilat synonin të trajtonin krizën e strehimit.

Dekretet u rrëzuan nga një shumicë parlamentare e krahut të djathtë, e përbërë nga Partia Popullore, Vox dhe forca katalanase Junts per Catalunya.

Në Madrid, protestuesit marshuan duke brohoritur “Turp!” dhe “Spekulatorët jashtë lagjeve tona!”.

Sipas autoriteteve të kryeqytetit, në protestë morën pjesë rreth 70 mijë persona, ndërsa Sindikata e Qiramarrësve vlerësoi pjesëmarrjen në më shumë se gjysmë milioni.