SPANJË – Tërmet me magnitudë 5 godet Granadën, dëme në ndërtesa

GRANADA, 15gudht /ATSH/ – Një tërmet me magnitudë 5 goditi gjatë natës së kaluar Spanjën. Epiqendra e lëkundjeve ishte në zonën e Alhendín, pranë Granadës, në rajonin jugor të Andaluzisë.

Tërmeti shkaktoi dëme materiale dhe rreth 100 telefonata në numrin e emergjencës 112. Lajmi bëhet i ditur nga Instituti Gjeografik Kombëtar i Spanjës, i cili e ka rishikuar në rritje magnitudën e tërmetit, fillimisht të vlerësuar në 4.8.

Tërmeti, me hipocentër në një thellësi prej vetëm 2 kilometrash, shkaktoi shkëputje të pjesëve të fasadave dhe kornizave, dëmtime në çatitë e ndërtesave, veçanërisht në Armilla, si dhe rënie të objekteve, të raportuara nga banorë të shumtë.

Shërbimet e emergjencës bëjnë të ditur se, pavarësisht dëmeve, deri tani nuk janë raportuar persona të plagosur apo viktima.
Lëkundjet u ndjenë në të gjithë provincën e Granadës, si dhe në provincat e Jaén, Almería, Málaga dhe Córdoba.

Gjashtë minuta pas tërmetit kryesor u regjistrua një pasgoditje me magnitudë 2.6, me epiqendër në Gójar.

Ndërkohë, gjatë ditës së djeshme, të premten, e njëjta zonë ishte goditur edhe nga tre tërmete të tjera me magnitudë më të ulët. /