SSP-ja çahet më tej: katër funksionarë të lartë tërhiqen nga lista “Evropska Srbija”

Pas ish-sekretarit të përgjithshëm të Partisë së Lirisë dhe Drejtësisë (SSP) Peđa Mitroviç dhe kryetares së bordit të Beogradit Mila Popoviç, edhe katër funksionarë të tjerë të lartë të SSP-së kanë tërhequr emrat e tyre nga lista zgjedhore “Evropska Srbija”, raporton portali Nova.rs. Bëhet fjalë për Borko Stefanoviçin, zëvendëskryetarin e SSP-së, deputeten nga Nishi Jelena Millosheviç, Vladimir Vrsajkovin nga Novi Sadi dhe nënkryetarin e SSP-së Goran Petroviç.

Sipas Nova-s, grupi tërhoqi kandidaturat për shkak të pakënaqësisë me vendimin për të dalë në zgjedhje jashtë një koalicioni më të gjerë opozitar, si dhe pas vendimit të koalicionit rreth NPS-së së Miroslav Aleksiçit për t’u tërhequr në favor të Listës Studentore.

Koalicionin “Evropska Srbija” e përbëjnë, përveç SSP-së së Dragan Đilasit, edhe Srbija centar SRCE i Zdravko Ponoshit dhe shoqata Solidarnost e Goran Jeshiçit. Ndërkohë, koalicionin rival “Narodna Srbija” e përbëjnë NPS-ja, NLS-ja e Millosh Parandiloviçit dhe shoqata Ekološki ustanak e Aleksandar Jovanoviç Ćutës.

Sipas legjislacionit zgjedhor serb, një listë koalicioni mund të tërhiqet formalisht vetëm deri në momentin kur Komisioni Republikan i Zgjedhjeve (RIK) shpall listën e përmbledhur zgjedhore; më pas tërheqja nuk është e mundur ligjërisht, pavarësisht deklaratave politike — kandidatët mbesin ligjërisht në fletëvotim. RIK-u ende mund të shpallë listën “Narodna Srbija”, pasi koalicioni rreth Aleksiçit dorëzoi numrin e munguar të firmave të vërtetuara të qytetarëve, gjë që lë të hapur mundësinë e ndryshimeve në ditët në vijim.

Burimi: Danas / Nova.rs