Startup-et hapësinore sigurojnë financim rekord prej 20.8 miliardë dollarësh në tremujorin e tretë

Startup-et hapësinore kanë tërhequr një financim rekord prej 20.8 miliardë dollarësh në tremujorin e tretë, teksa investitorët derdhën para te kompanitë e lëshimit, prodhimit dhe infrastrukturave të tjera hapësinore, sipas një raporti të firmës globale të investimeve Seraphim, siç njofton Reuters.

Shifra është gati trefishi i 7.4 miliardë dollarëve të investuar në tremujorin e dytë dhe më shumë se dyfishi i kulmit të mëparshëm. Edhe po të përjashtohet financimi prej 10 miliardë dollarësh i Blue Origin, investimi mbetet në nivelin më të lartë historik prej 10.8 miliardë dollarësh, çka, sipas raportimit të Reuters, nënvizon kërkesën në rritje në të gjithë sektorin. Raporti i publikuar të mërkurën numëroi edhe një rekord prej 216 marrëveshjesh të mbyllura gjatë tremujorit, nga 140 në tre muajt e mëparshëm.

Pjesën më të madhe të aktivitetit e zunë bizneset e lidhura me infrastrukturën. Kompanitë e lëshimit dhe të qasjes në hapësirë tërhoqën 16.4 miliardë dollarë në 120 marrëveshje, ndërsa kompanitë e komunikimeve satelitore, vëzhgimit të Tokës dhe shërbimeve të tjera hapësinore mblodhën 4 miliardë dollarë. Raundet më të mëdha të tremujorit përfshinë 1.37 miliardë dollarë për Hadrian, 1 miliard për Stoke Space dhe 500 milionë dollarë për K2 Space.

Sipas Seraphim, kërkesa nga mbrojtja dhe shtetet po e mbështet gjithnjë e më shumë investimin në lëshim, prodhim dhe infrastrukturë orbitale, ndërsa qeveritë i japin përparësi kapaciteteve vendase hapësinore. Amerika e Veriut përbënte rreth 70 për qind të financimit global që nga fillimi i vitit, ndërsa Kina shënoi një rekord tremujor prej 3.3 miliardë dollarësh në 49 marrëveshje.

Megjithatë, siç njofton Reuters, vërshimi i investimeve private erdhi në kontrast me performancën më të dobët të kompanive hapësinore të listuara në bursë, shumë prej të cilave vazhdojnë të jenë me humbje. Seraphim pret që financimi të zbutet nga niveli i jashtëzakonshëm i tremujorit të tretë, por të mbetet mbi normat historike, ndërsa gjithnjë e më shumë kompani hyjnë në fazat e rritjes dhe zgjerimit.