Stina koncertore e Fakultetit të Muzikës, një koncert me krijimtarinë e kompozitorëve të rinj

Stina koncertore e Fakultetit të Muzikës vijon me koncerte të ndryshme, ku pjesë është dhe krijimtaria e kompozitorëve të rinj. Në vijim të koncerteve që janë zhvilluar deri më tani në kuadër të kësaj stine koncertore, këtë mbrëmje do të jetë koncerti i klasës së kompozicionit. “Janë të gjithë të ftuar të ndjekin këtë koncert të veçantë me krijimtarinë e kompozitorëve të rinj”, thuhet në njoftimin rreth këtij koncerti që zhvillohet në sallën “Çesk Zadeja”.

Një ditë më pas, Fakulteti i Muzikës-Universiteti i Arteve vjen me koncertin vokal – instrumental të studentëve të pianos, violinës e kantos nën drejtimin e pedagogëve prof. asoc. Fatmira Keta, lekt. Merita Balliu dhe lekt. Lea Kilica. Ky koncert do të zhvillohet në sallën “Çesk Zadeja” UART. Përpara këtyre dy koncerteve, më 2 qershor u bë me dije dhe zhvillimi i koncertit të studentëve të fizarmonikës në klasën e profesorit Elton Balla.

Struktura e Fakultetit të Muzikës është e organizuar në tre departamente: Departamenti i Interpretimit (DI), me programet e studimit piano, harqe, fizarmonikë klasike, kitarë, instrumente frymore. Departamenti Kompozicion – Muzikologji – Dirigjim – Pedagogji (KMDP), me programet e studimit Kompozicion, Muzikologji, Dirigjim dhe Pedagogji Muzikore. Departamenti i Kantos me programin e studimit Kanto. Fakulteti i Muzikës zhvillon një jetë artistike aktive me pjesëmarrjen e gjerë të studentëve dhe pedagogëve. Koncertet mbahen në sallën e madhe të koncerteve dhe në sallat e tjera të Universitetit të Arteve në Tiranë, përgjatë të gjithë vitit akademik.