STRASBURG – Von der Leyen propozon që Kanadaja të bëhet anëtare e asociuar e BE-së

Gjatë një fjalimi në Parlamentin Evropian në Strasburg, ku ishte i pranishëm edhe kryeministri kanadez Mark Carney, von der Leyen tha se BE-ja dhe Kanadaja duhet të krijojnë një aleancë për të ndërtuar një hapësirë të përbashkët të prosperitetit dhe sigurisë ekonomike.

Ajo tha se bashkëpunimi i ri do të përfshinte sektorë strategjikë si prodhimi, teknologjia dhe inteligjenca artificiale, industria e mbrojtjes, angazhimi në rajonin e Arktikut, energjia dhe mineralet kritike.

”Evropa dhe Kanadaja besojnë te demokracia. Fuqia nuk u përket më të fortëve, më të pasurve apo atyre që flasin më fort, por të gjithë neve”, deklaroi Von der Leyen.

”Duhet urgjentisht të rimendojmë partneritetet tona. Prandaj, do të doja të punoja me ju për t’i hapur derën Kanadasë që të bëhet anëtarja e parë e asociuar e BE-së”, shtoi ajo.

Deklarata e presidentes së Komisionit Evropian u prit me duartrokitje në këmbë nga një pjesë e deputetëve evropianë.

Nga ana e tij, Carney ka deklaruar më herët këtë javë se Kanadaja synon të ndërtojë një aleancë unike me Bashkimin Evropian.

Megjithatë, statusi i anëtarit të asociuar nuk ekziston aktualisht në kuadrin ligjor të BE-së dhe krijimi i një formule të tillë do të kërkonte përcaktimin e një kuadri të ri ligjor dhe politik.

Kanadaja dhe BE-ja kanë tashmë marrëdhënie të ngushta tregtare përmes Marrëveshjes Gjithëpërfshirëse Ekonomike dhe Tregtare (CETA). Otava ka kërkuar kohët e fundit forcimin e lidhjeve me partnerët evropianë, në një kohë kur marrëdhëniet tregtare me Shtetet e Bashkuara janë tensionuar./ a.jor.