Studentët në Serbi nisin sot aksionin “Derë më derë” në mbarë vendin — deri më 20 shtator

Studentët në bllokadë në Serbi kanë njoftuar nisjen e aksionit “Derë më derë” (Od vrata do vrata) në mbarë vendin, që zgjat nga sot, 18 shtator, deri më 20 shtator. Gjatë tri ditëve, ata do të zhvillojnë biseda me qytetarët në rrugë, sheshe, lagje dhe në dhjetëra vende të Serbisë.

Aksioni organizohet në mbështetje të listës së tyre zgjedhore “Studentska lista – Studenti pobeđuju” (Lista Studentore – Studentët fitojnë), të kandiduar për zgjedhjet e parakohshme parlamentare të 25 tetorit.

“Tani kemi një emër në fletëvotim, por në terren mbetemi të njëjtë — rrugët, sheshet, lagjet, dyert që trokasim, me durim. Dallimi është se tani, kur i themi dikujt për çfarë luftojmë, mund t’i tregojmë edhe ku të vendosë firmën e mbështetjes”, thuhet në njoftimin e studentëve.

Lista e vendeve dhe orareve ku do të jenë të pranishëm studentët publikohet në faqen blokade.org. Mes lokacioneve janë Veternik, Pančevo, Bečej, Kaluđerica, Vrbas, Subotica, Novi Beograd, Sremski Karlovci, Kikinda, Bački Petrovac, Senta e shumë të tjera.

Slogani i aksionit është: “Shihemi në gjithë Serbinë — firmos, bisedo, bashkohu”.

Burimi: Danas