Sulmi rus vret tre persona në qytetin ukrainas të Krivyi Rih

Një sulm me raketa ruse vrau tre persona në qytetin Kryvyi Rih në Ukrainën qendrore, thanë zyrtarët ukrainas të martën duke akuzuar Rusinë se ka goditur një zonë civile me municione thërrmuese.

Oleksandr Vikul, kreu i këshillit të mbrojtjes së qytetit, tha në një postim në aplikacionin Telegram se 25 persona u plagosën gjithashtu në sulm, i cili u krye nga një raketë balistike që mbante një kokë luftarake me municione thërrmuese.

“Njerëzit që vdiqën ishin 200 metra larg njëri-tjetrit për shkak të kësaj arme barbare”, tha Vikul, duke shtuar se nesër do të shpallet një ditë zie në qytet.

Presidenti Volodymyr Zelensky, i cili vjen nga Krivyi Rih, reagoi ndaj sulmit duke bërë thirrje për më shumë presion ndërkombëtar mbi Rusinë për t’i dhënë fund luftës dhe për një furnizim më të shpejtë të Ukrainës me pajisje kundërajrore.