TAJPEI – Tajvani nis manovrat më të mëdha ushtarake mes rritjes së presionit nga Kina

TAJPEI, 5 gusht /ATSH-AFP/ – Tajvani ka nisur manovrat më të mëdha ushtarake të vitit, në një kohë kur tensionet me Kinën vazhdojnë të rriten.

Manovrat vjetore “Han Kuang”, të cilat do të zhvillohen nga 5 deri më 14 gusht, synojnë të përgatisin ushtrinë dhe popullsinë civile për një skenar të mundshëm pushtimi nga Pekini.

Gjatë manovrave do të simulohen skenarë luftarakë për forcat e armatosura dhe rezervistët, ndërsa edhe civilët do të përfshihen në ushtrime të mbrojtjes civile.

Autoritetet kanë njoftuar se do të zhvillohen prova për alarmet ajrore dhe madje do të ngadalësohet përkohësisht shpejtësia e internetit celular për të testuar reagimin ndaj ndërprerjeve të komunikimit.

Kina e konsideron Tajvanin pjesë të territorit të saj dhe nuk e ka përjashtuar përdorimin e forcës për ta vendosur ishullin nën kontrollin e saj.

Vitet e fundit, Pekini ka shtuar ndjeshëm aktivitetin ushtarak rreth Tajvanit, me fluturime të shpeshta të avionëve luftarakë, patrullime të anijeve luftarake dhe operacione të Gardës Bregdetare në zonat përreth ishullit.

Në ditën e parë të stërvitjeve, rezervistët zhvilluan qitje me armë në plazhe që përballen me Ngushticën e Tajvanit, duke simuluar mbrojtjen ndaj një zbarkimi të mundshëm të forcave kineze.

Në pjesë të tjera të vendit u angazhuan tanke, mjete të blinduara, anije luftarake, një nëndetëse dhe helikopterë Black Hawk.

Një risi e këtij viti është decentralizimi i komandës, duke u dhënë komandantëve në terren më shumë liri për të marrë vendime pa pritur urdhra nga qendra.

Gjithashtu, ushtria po teston përdorimin e koordinuar të dronëve zbulues dhe sulmues, si pjesë e strategjisë së luftës asimetrike përballë epërsisë ushtarake të Kinës.

Presidenti Lai Ching-te deklaroi se Tajvani do të vazhdojë të forcojë mbrojtjen kombëtare dhe rezistencën e gjithë shoqërisë përballë kërcënimeve në rritje.

Ndërkohë, qeveria synon ta rrisë buxhetin e mbrojtjes në 5% të Prodhimit të Brendshëm Bruto deri në vitin 2030, edhe pse përballet me kundërshtime në parlament për nivelin e shpenzimeve ushtarake.

Ministri i Mbrojtjes, Wellington Koo, theksoi se vetëm përmes stërvitjeve intensive Tajvani mund të jetë plotësisht i përgatitur për të përballuar çdo kërcënim të mundshëm./ /Ad.Ab./ a.jor.