Teatri i Ri Kombëtar, Gonxhja: Punimet e infrastrukturës mund të zgjasin edhe një vit

Punimet për infrastrukturën e Teatrit të Ri Kombëtar mund të zgjasin edhe një vit, për shkak të kompleksitetit të projektit dhe problematikave të konstatuara gjatë gërmimeve, deklaroi ministri i Turizmit, Kulturës dhe Sportit, Blendi Gonxhja.

Gjatë një prononcimi në media, Gonxhja bëri të ditur se në fazën e punimeve nëntokësore janë evidentuar ndryshime në themele, si dhe tunele nën zonën ku po ndërtohet godina e re, duke sjellë nevojën për përshtatje të projektit.

Ministri theksoi se këto problematika kanë ndikuar në ecurinë e punimeve, ndërsa bëri të ditur se gjatë zbatimit të projektit ka pasur edhe dy-tre ndërprerje.

“Investimi për godinën e re një herë në jetë bëhet. Është nga ato investime që janë shumë komplekse”, u shpreh Gonxhja.

Ai nënvizoi se po punohet për përfundimin sa më të shpejtë të projektit, me synimin që Teatri Kombëtar të rikthehet në një godinë të re, në vendndodhjen e teatrit të mëparshëm.

“Investimi për godinën e re një herë në jetë bëhet. Është nga ato investime që janë shumë komplekse, ka patur dy-tre ndalime gjatë rrugës, sepse ka pasur në themele, në gërmimet e pjesës nëntokësore, disa ndryshime, dhe ndodhin në projekte kaq komplekse. Ka pasur një ndryshim në studimin e asaj zone, atij blloku, dhe nga pikëpamja ligjore, ndërtimore, e infrastrukturës, disa tuneleve të gjetura poshtë. Ju siguroj që Teatri Kombëtar në vendin ku ka qenë Teatri i vjetër Kombëtar është nga ato vepra… Po bëhet maksimumi që të kemi sa më shpejt një Teatër Kombëtar në një godinë të re. Teatri Kombëtar mund të dojë edhe 1 vit që të mbarojë kontrata bazë me punimet për infrastrukturën”, tha Gonxhja