Teherani po përgatitet për një përballje të re me SHBA-në dhe teston sisteme të reja të mbrojtjes ajrore

Teherani po përgatitet për një përballje të re me Shtetet e Bashkuara dhe po teston sisteme të reja të mbrojtjes ajrore, pavarësisht deklaratës së presidentit amerikan Donald Trump se nuk do ta sulmojë Iranin para zgjedhjeve afatmesme të nëntorit, siç njofton Al Jazeera.

Mokhtar Haddad, kryeredaktori i gazetës iraniane Al-Wefaq, i tha Al Jazeera-s të shtunën se Irani nuk u beson deklaratave të Trump-it, ndërsa çdo marrëveshje e mundshme me Uashingtonin shihet në Teheran si e përkohshme.

Sipas tij, autoritetet iraniane po përgatiten për një konflikt të zgjatur, që mund të zgjasë deri në dy vitet e ardhshme, dhe po forcojnë mbrojtjen ajrore përmes testimit të sistemeve të reja.

Deklaratat e Haddad vijnë pak ditë pasi Trump njoftoi se SHBA-ja nuk do ta sulmojë Iranin “në asnjë moment para zgjedhjeve afatmesme” të 3 nëntorit, duke theksuar se bllokada ndaj Iranit do të mbetet “në fuqi të plotë”.

Forcimi i mbrojtjes ajrore sinjalizon se Teherani e merr seriozisht mundësinë e një vale të re sulmesh amerikane, edhe pse presidenti amerikan thotë publikisht se veprimi ushtarak nuk është i afërt.