Tenderi për ndërtimin e sallës sportive qendrore në Sukuruq: kapacitet 2.000 vendesh

Kryetari i komunës së Tuzit, Lindon Đeljaj, njoftoi se është shpallur tenderi për ndërtimin e sallës sportive qendrore në Sukuruq, siç raporton RTCG.

Salla e re do të ketë kapacitet prej 2.000 vendesh dhe do të jetë e përshtatur për disiplina të ndryshme sportive, përfshirë futbollin, basketbollin, volejbollin dhe sporte të tjera, duke synuar përmirësimin e infrastrukturës sportive dhe të kushteve për sportistët, klubet dhe qytetarët.

“Me shpalljen e tenderit kemi bërë një hap të rëndësishëm drejt realizimit të projektit që do t’u mundësojë sportistëve tanë, klubeve, të rinjve dhe të gjithë qytetarëve kushte më të mira për sport dhe aktivitete sportive. Presim ofertat, pas së cilave, në përputhje me procedurën e tenderit, do të zgjidhet oferta me çmimin më të ulët që përmbush të gjitha kushtet e përcaktuara,” tha Đeljaj.

Sipas tij, përveç sheshit “Gjergj Kastrioti – Skënderbeu” dhe Arenës “Besa”, edhe salla e re sportive do të marrë emër në frymën e krenarisë kombëtare, duke e lidhur sportin me historinë dhe identitetin e këtij vendi.

“Pengesa nuk e ndalin Malësinë. Ne u përgjigjemi atyre me punë, me projekte konkrete dhe me vazhdimin e zhvillimit të komunës sonë. Ndërtimi i sallës sportive qendrore është edhe një hap i rëndësishëm në krijimin e infrastrukturës më të mirë sportive dhe mundësive të reja për brezat e ardhshëm,” përfundoi kryetari i Tuzit.