Tentoi të vriste një person me eksploziv në automjet, arrestohet 21-vjeçari në Sarandë

Policia e Sarandës ka arrestuar një 21-vjeçar, i dyshuar si bashkëpunëtor në atentatin me eksploziv ndaj një shtetasi, ngjarje e ndodhur më 5 shkurt 2026 në vendin e quajtur “Kryqëzimi i Urës së Vrinës”.

Sipas uniformave blu, në kuadër të operacionit të koduar “Identifikimi”, u ndalua shtetasi I.K., 21 vjeç, banues në fshatin Shëndëlli, ndaj të cilit Prokuroria e Sarandës kishte lëshuar urdhër ndalimi për veprat penale “Vrasja me paramendim”, e mbetur në tentativë dhe e kryer në bashkëpunim, si dhe “Mbajtja pa leje e armëve dhe municionit”.

Nga hetimet rezulton se i riu dyshohet të ketë bashkëpunuar me dy persona të shpallur më herët në kërkim, G.T. dhe Xh.B., të cilët akuzohen se kanë vendosur lëndë plasëse në automjetin që drejtonte shtetasi M.Gj.

Gjatë operacionit për kapjen e tij, policia ushtroi kontroll në banesën e 21-vjeçarit, ku gjeti dhe sekuestroi një armë zjarri pistoletë me municion luftarak, e cila mbahej pa leje.

Autoritetet bëjnë me dije se hetimet vijojnë për identifikimin e personave të tjerë të përfshirë në këtë ngjarje, ndërsa po vazhdojnë kontrollet për lokalizimin dhe arrestimin e dy të dyshuarve të shpallur në kërkim.