“Tgcom24” – Sekuestrohen 2,6 tonë kokainë në Atlantik, mes të arrestuarve edhe një shqiptar

– Në kuadër të një hetimi koordinuar nga Zyra e Prokurorit Anti-Mafia të Breshias (DDA), Guardia di Finanza e Italisë, në bashkëpunim me autoritetet e Spanjës dhe Portugalisë, ka sekuestruar mbi 2,6 tonë kokainë në Oqeanin Atlantik dhe ka arrestuar katër persona të dyshuar për trafik ndërkombëtar droge, sipas medias italiane “Tgcom24”.

Operacioni u zhvillua pranë brigjeve të Lisbonës, ku Policia Detare portugeze ndaloi një gomone oqeanike shumë të shpejtë të tipit “go-fast”, e përdorur shpesh nga grupet kriminale për transportin e sasive të mëdha të lëndëve narkotike.

Të arrestuarit janë dy shtetas spanjollë, një shtetas i Gjibraltarit dhe një shtetas shqiptar, ky i fundit banues në Mantova dhe me vendbanim në provincën e Breshias, në Itali.

Sipas autoriteteve italiane, mjeti lundrues u monitorua vazhdimisht nga avionët e Guardia di Finanza, të pajisur me teknologji të avancuar për mbikëqyrjen detare.

Këta avionë ishin dislokuar në Gadishullin Iberik në kuadër të operacioneve për kontrollin e kufijve të jashtëm të Bashkimit Evropian.

Vlera e kokainës së sekuestruar llogaritet në rreth 78 milionë euro në tregun e shumicës, ndërsa nëse droga do të shpërndahej në tregun e pakicës, do të gjeneronte të ardhura të vlerësuara në rreth 500 milionë euro.

Hetimet kanë konfirmuar se organizatat kriminale, po përdorin gjithnjë e më shpesh gomone të tipit “go-fast”, me gjatësi nga 10 deri në 16 metra dhe të pajisura me disa motorë të fuqishëm, të aftë të arrijnë shpejtësinë mbi 130 kilometra

Këto mjete janë të vështira për t’u kapur dhe përdoren kryesisht për transportin e drogës në rrugët detare ndërkombëtare. /