Thirrjet në varrimin e Khamenei: Të vrasim Trump! Vdekje Amerikës!

Një folës në ceremoninë mortore të ish-liderit suprem iranian, Ali Khamenei, bëri thirrje për vdekjen e presidentit të Shteteve të Bashkuara, Donald Trump.

Duke folur përpara besimtarëve të mbledhur pranë arkivolit me trupin e Khamenei, Mohammad Rasouli tha: “Përse nuk duhet ta vrasim atë që vrau imamin dhe liderin tonë?”.

“Është një turp për ne nëse nuk e vrasim vrasësin e tij”, shtoi ai.

Postera dhe banera në mbështetje të idesë për të vrarë Trump dhe kryeministrin izraelit, Benjamin Netanyahu ishin ngado gjatë ceremonisë.

Thirrjet vijnë teksa mes Uashingtonit dhe Teheranit vazhdojnë negociatat për t’i dhënë fund luftës që nisi më 28 shkurt, me vrasjen e Khamenei.

Gjatë fjalimit përpara turmës, Rasouli u bëri thirrje pjesëmarrësve të brohorisnin “vdekje Amerikës”, “vdekje Izraelit” dhe “Trump po vret misionin tonë”.

Fjalët u pritën me duartrokitje, pasi ai pyeti turmën: “Përse njeriu më i neveritshëm në botë është ende gjallë?”.

Të pranishmit në ceremoninë mortore të së dielës ishin shumë më tepër në numër se ata të mbledhur ditën paraardhëse.

Një flamur i kuq që mbante frazën “Hakmarrësit e Huseinit” u ngrit mbi kupolën e xhamisë Mosalla të Teheranit gjatë eventit.

Ai është simbol i thirrjes për hakmarrje për vrasjen e Hussein Bin Ali, imami i tretë i Islamit Shiit. Shumë pjesëmarrës po mbanin gjithashtu flamur të kuq si simbol i shpagimit.