Tom Cruise dhe Elsina Khayrova ndezin sërish thashethemet për romancë

 

Tom Cruise ka nxitur spekulime të reja për jetën e tij sentimentale pasi u shfaq me Elsina Khayrova në ceremoninë e inaugurimit të yllit të David Beckham në Hollywood Walk of Fame.

Paraqitja e tyre e përbashkët ka rikthyer aludimet se dyshja mund t’i ketë dhënë një tjetër shans marrëdhënies së tyre, e cila bëri bujë në fillim të vitit 2024 përpara se mediat të raportonin për ndarjen e tyre.

Cruise u shfaq elegant me një kostum ngjyrë vishnje të errët, ndërsa Khayrova tërhoqi vëmendjen me një fustan blu. Mbërritja e tyre së bashku në një nga ngjarjet më të fotografuara të javës në Hollywood u komentua gjerësisht nga mediat rozë.

Khayrova, e lindur në Rusi dhe me shtetësi britanike, është vajza e politikanit rus Rinat Khayrov. Ajo ka qenë më parë e martuar me biznesmenin e diamantëve Dmitry Tsvetkov dhe është nënë e dy fëmijëve.

Romanca mes Cruise dhe Khayrova u raportua për herë të parë në fund të vitit 2023, kur ata u panë së bashku në disa evente private në Londër. Megjithatë, vetëm disa muaj më vonë u raportua se marrëdhënia kishte marrë fund në mënyrë miqësore.

Pas kësaj, Cruise u përfol për një lidhje me aktoren kubane Ana de Armas gjatë vitit 2025, por raportet për atë romancë u zbehën në fund të vitit.

Deri më tani, as Cruise dhe as Khayrova nuk kanë komentuar publikisht mbi natyrën e marrëdhënies së tyre, por paraqitja e fundit së bashku ka mjaftuar për të ndezur sërish thashethemet për një rikthim romantik.