TOP BAROMETER: PS-ja zbret në dyshemenë e saj elektorale, por…

Nga Eduard Zaloshnja

Dje zhvillova sondazhin elektronik TOP BAROMETER për emisionin Top Story, përmes shpërndarjes së linkut të pyetësorit me SMS krejt të rastësishme nga Vermoshi në Konispol. Pyetësorin e plotësuan 1411 banorë të rritur të vendit.

Nga sondazhi rezultoi se vetëm 60% e popullsisë së rritur të vendit do të votonte sot, nëse zhvillohen zgjedhje parlamentare (shihni grafikun 5).

Po ata që votuan vjet brenda vendit, si do të votonin sot?

Rreth 42.4% do të votonin sot për PS-në, nga 52.2% që votuan vjet për të. Rreth 23.9% do të votonin sot për PD-ASHM-në, nga 34.3% që votuan vjet për të. Dhe rreth 11.6% do të votonin sot për partitë e vogla që garuan vjet (10 gjithsej), nga 13.5% që votuan vjet për to (shihni grafikun 6).

Nga gjithë sondazhet që kam zhvilluar pas zgjedhjeve të vjetshme, më rezulton se PS-ja ka zbritur aktualisht në dyshemenë e saj elektorale. Në një situatë të ngjashme ka qenë vetëm pasi SPAK-u kërkoi pezullimin e Belinda Ballukut nga postet e saj në qeveri. Sidoqoftë, sot PS-ja ka pothuaj dyfishin e votave të PD-ASHM-së, ndërkohë që partitë e vogla janë shumë poshtë saj.

Meqë kampioni i sondazhit përfaqëson me përafërsi statistikore të gjithë popullsinë e rritur të vendit, mund të ekstrapolohet statistikisht se rreth 760 mijë banorë të rritur nuk do të votonin sot për asnjë nga partitë ekzistuese (40% e 1.9 milionëve).

Po si votuan vjet ata që nuk do të votonin sot?

Rreth 57.5% nuk votuan fare vjet; pothuaj 20% votuan vjet për PD-ASHM-në; pothuaj 19% votuan për PS-në; dhe rreth 3.7% votuan për partitë e vogla (shihni grafikun 7).