Trashëgimia kulturore nënujore, thesaret e fshehura të historisë

Dita Ndërkombëtare e Trashëgimisë Kulturore Nënujore, e cila festohet çdo vit më 21 gusht, synon mbrojtjen e trashëgimisë kulturore të zhytur në oqeane, dete, lumenj dhe liqene.

Më 21 gusht 2022 u nis misioni i parë ndërkombëtar i arkeologjisë nënujore, nën kujdesin e UNESCO-s, me pjesëmarrjen e tetë vendeve. Kjo ditë ndërkombëtare vlerëson kontributin thelbësor të trashëgimisë kulturore nënujore në shkencë, arsim dhe identitetin kulturor të popujve, dhe të gjithë atyre që i kushtojnë kohën e tyre mbrojtjes së saj.

Trashëgimia kulturore nënujore përfshin gjurmët e veprimtarisë njerëzore që ndodhen nën ujë dhe kanë rëndësi historike, arkeologjike ose kulturore. Këtu përfshihen anije të mbytura, porte dhe vendbanime të lashta, struktura arkeologjike, objekte historike dhe peizazhe të zhytura.

UNESCO dhe organizata të tjera ngrenë alarmin mbi kërcënimet ndaj kësaj trashëgimie kulturore si dhe inkurajojnë turizmin e përgjegjshëm dhe të qëndrueshëm, duke bërë thirrje për të ndaluar aktivitetet e paligjshme. Mbi të gjitha, kjo ditë ndërkombëtare bashkon njerëzit dhe vendet, duke ndërtuar një lëvizje globale për të mbrojtur trashëgiminë kulturore nënujore dhe për të siguruar që ajo të mbetet e mbrojtur për brezat e rinj dhe të ardhshëm.