Trump dhe Rubio nismë ndërkombëtare kundër ekstremizmit të majtë, disa aleatë refuzojnë pjesëmarrjen

Administrata e presidentit amerikan Donald Trump ka nisur një përpjekje për të koordinuar një përgjigje ndërkombëtare ndaj asaj që e cilëson si rritje të ekstremizmit të majtë me lidhje ndërkufitare.

Sekretari amerikan i Shtetit, Marco Rubio, ka ftuar përfaqësues të nivelit të lartë nga më shumë se 60 vende në një takim që pritet të zhvillohet javën e ardhshme në Uashington. Sipas raportimeve të The Washington Post, konferenca do të fokusohet te ajo që administrata amerikane e përshkruan si “ringjallja e terrorizmit transnacional të ekstremit të majtë”.

Nisma ka shkaktuar debate si brenda administratës amerikane, ashtu edhe mes disa aleatëve evropianë, të cilët nuk e konsiderojnë ekstremizmin e majtë si një nga kërcënimet kryesore për sigurinë kombëtare.

Sipas raportimeve, disa zyrtarë amerikanë kanë ngritur shqetësime se mekanizmat e përdorur në luftën kundër terrorizmit mund të përdoren për të hetuar apo goditur aktivistë amerikanë të lidhur me lëvizjen antifashiste “Antifa”.

Koordinatori i administratës për luftën kundër terrorizmit, Sebastian Gorka, raportohet se ka diskutuar mundësinë e klasifikimit të “Antifës” si organizatë terroriste e huaj. Një vendim i tillë do t’u jepte autoriteteve amerikane kompetenca më të zgjeruara hetimore, përfshirë përdorimin e mjeteve të posaçme të mbikëqyrjes.

Megjithatë, ekspertë ligjorë dhe ish-zyrtarë të Departamentit amerikan të Shtetit kanë vënë në dukje vështirësitë ligjore të një klasifikimi të tillë. Sipas legjislacionit amerikan, një organizatë duhet të ketë bazë jashtë Shteteve të Bashkuara për t’u shpallur “organizatë terroriste e huaj”, ndërsa “Antifa” konsiderohet një rrjet i decentralizuar me aktivitet kryesisht brenda SHBA-së.