Trump në Kansas: SHBA do të digjet si Franca nëse fitojnë demokratët

Presidenti amerikan Donald Trump përdori të hënën trazirat e dhunshme në Francë si argument kundër demokratëve, në betejën për të mbrojtur një vend në Senatin e Kansasit që republikanët e mbajnë prej kohësh, por që tani rrezikon t’u kalojë kundërshtarëve politikë, siç njofton Reuters.

Tubimi në mbështetje të senatorit në detyrë Roger Marshall ishte ndalesa e fundit e Trump-it në shtetet konservatore, ku kandidatët republikanë janë në mbrojtje për shkak të pakënaqësisë së votuesve me luftën me Iranin dhe me rritjen e çmimeve. “Ju dua, Kansas, por jam këtu për një njeri që quhet Roger Marshall”, tha Trump para mbështetësve.

Në një shtesë të re në fjalimin e tij të fushatës, Trump iu referua protestave të gjera në Francë si një skenar që mund të shpërthejë edhe në Shtetet e Bashkuara nëse republikanët nuk fitojnë, pa paraqitur prova për këtë. Franca ka parë ditët e fundit disa nga trazirat më të rënda në vite, pasi protestat e mëdha për koston e jetesës dhe shërbimet publike të pafinancuara degjeneruan në trazira dhe plaçkitje.

“Nuk do të lejojmë që kjo t’i ndodhë këtij vendi”, tha Trump, duke iu drejtuar retorikës kundër emigrantëve dhe myslimanëve. “Kur shihni kambanare që digjen dhe zjarre të furishme në Francë, mbani mend se kjo është ajo që ‘Dumokratët’ radikalë duan t’i bëjnë Amerikës.” Sipas Reuters, Trump i ka tallur vazhdimisht demokratët duke i quajtur “Dumocrats”.

Vetë Trump është përballur me vështirësi për t’i bërë mallrat dhe shërbimet më të përballueshme në Shtetet e Bashkuara. Mbrojtësit e të drejtave e kanë kritikuar vazhdimisht presidentin për retorikën e tij ndër vite ndaj emigrantëve dhe pakicave etnike, ndërsa grupet e të drejtave civile thonë se një retorikë e tillë normalizon qëndrimet diskriminuese ndaj këtyre komuniteteve.