Trump thotë se po ‘i ndalon’ CNN, MS NOW dhe Politico nga Shtëpia e Bardhë

Presidenti amerikan Donald Trump deklaroi të premten se po ndalon gazetarët e CNN, MS NOW dhe Politico nga Shtëpia e Bardhë, duke i akuzuar ata për raportim “fiksoni dhe gënjeshtra”, pa identifikuar asnjë raportim konkret që e kishte shtyrë këtë hap.

Njoftimi u bë përmes një postimi në platformën Truth Social të premten pasdite, ku Trump shkroi se vendimi është “efektiv menjëherë”.

Në postimin e tij, Trump u shpreh se mediat “nuk duhet të shkruajnë apo raportojnë vazhdimisht FIKSION dhe GËNJESHTRA kur mbulojnë Presidentin e Shteteve të Bashkuara, Administratën Trump apo Shtetet e Bashkuara të Amerikës”, duke shtuar se “mediet e tjera Fake News do të pasojnë”.

Deri në orët e pasdites së të premtes nuk kishte asnjë tregues se administrata kishte ndërmarrë hapa konkretë për zbatimin e ndalimit. Ekipi i CNN vazhdonte të ishte në Shtëpinë e Bardhë, ndërsa tria organizatat mediatike ende nuk kishin reaguar zyrtarisht.

Sipas agjencisë Reuters, vendimi shënon një përshkallëzim të ashpër të luftës disavjeçare të Trump me shtypin. Edhe më herët këtë vit, ai e kishte hequr agjencinë Associated Press nga grupi i ngushtë i shtypit të Shtëpisë së Bardhë, pas mosmarrëveshjes për emërtimin “Gulf of America” — AP e paditi administratën dhe çështja vazhdon në gjykatë.

Trump ka paditur gjithashtu gazetat Wall Street Journal dhe New York Times për shpifje, ndërkohë që Departamenti i Drejtësisë kishte lëshuar dhe më pas tërhequr thirrje ndaj gazetarëve të të dyja mediave.

Njoftimi vjen në një moment delikat politikisht: një sondazh i Marquette këtë javë tregoi se miratimi i Trump ka rënë në 37%, nivelin më të ulët të mandatit të dytë, ndërsa kandidatët republikanë për Senat po përballen me gara të ngushta në shtete tradicionalisht republikane si Iowa, Alaska dhe Kansas.

Burimi: USA Today