Tyra Banks padit Netflix për shpifje: “Më manipuluan”

Modelja dhe prezantuesja e njohur Tyra Banks ka ngritur një padi ndaj Netflix, duke e akuzuar platformën për shpifje dhe manipulim të deklaratave të saj në dokumentarin “Reality Check: Inside America’s Next Top Model”.

Sipas dokumenteve të paraqitura në gjykatë, Banks pretendon se pranoi të merrte pjesë në dokumentar sepse besonte se publiku meritonte një diskutim të sinqertë mbi trashëgiminë e emisionit “America’s Next Top Model”, përfshirë sukseset dhe kritikat që e kanë shoqëruar ndër vite.

Ajo thotë se gjatë një interviste që zgjati më shumë se tre orë, iu përgjigj pa kufizime pyetjeve të producentëve, duke folur edhe për vendime që sot do t’i trajtonte ndryshe.

Megjithatë, sipas saj, në versionin final të dokumentarit u përdorën vetëm rreth 16 minuta nga intervista, ndërsa deklaratat e saj u nxorën jashtë kontekstit dhe u montuan në mënyrë që të krijonin një narrativë të rreme.

Banks pretendon se dokumentari krijoi përshtypjen sikur ajo kishte lejuar me vetëdije që një konkurrente të përjetonte një sulm seksual gjatë xhirimeve të emisionit dhe më pas kishte shfrytëzuar traumën e saj për audiencë.

“Ky është një trillim i plotë që iu transmetua miliona shikuesve në mbarë botën”, thuhet në padi.

Ish-supermodelja kundërshton gjithashtu pretendimet se nuk kishte reaguar ndaj raportimeve për sjellje të papërshtatshme në prapaskenat e emisionit, duke theksuar se kishte njoftuar menjëherë drejtuesit dhe se produksioni ishte pezulluar përkohësisht për të zhvilluar trajnime mbi ngacmimin seksual.

Tyra Banks po kërkon që çështja të shqyrtohet nga një juri, e cila do të vendosë edhe për shumën e mundshme të dëmshpërblimit.

Deri më tani, Netflix nuk ka reaguar publikisht ndaj padisë.