U goditën në makinën e tyre, Hita viziton policët te Trauma: Sakrifica e çdo punonjësi vlerësohet maksimalisht

Dy punonjës të Policisë së Korçë kanë mbetur të plagosur gjatë një operacioni për goditjen e shpërndarjes së lëndëve narkotike në aksin rrugor Korçë–Pogradec, pranë fshatit Lumalas.

Efektivët kanë konstatuar një nga personat e dyshuar për shpërndarje të lëndëve narkotike dhe kanë tentuar ta ndalojnë. Në përpjekje për t’i shpëtuar arrestimit, 21-vjeçari dyshohet se ka goditur qëllimisht me automjetin e tij makinën ku udhëtonin dy efektivwt, duke shkaktuar plagosjen e tyre.

Si rezultat i operacionit, u bë arrestimi në flagrancë i dy shtetasve, përkatësisht 19 dhe 21 vjeç, ndërsa një 27-vjeçar u shpall në kërkim. Ky i fundit dyshohet se ishte pronar i një lokali ku shpërndahej lëndë narkotike dhe ushtrohej aktivitet i paligjshëm i lojërave të fatit.

Gjatë kontrolleve, policia sekuestroi në cilësinë e provës materiale sasi të dyshuara të Cannabis sativa dhe Kokainë, të ndara në doza për shitje, si dhe një tavolinë pokeri që përdorej për aktivitetin e paligjshëm.

Drejtori i Përgjithshëm i Policia e Shtetit, Skender Hita, vizitoi në Spitali i Traumës njërin nga efektivët e plagosur gjatë operacionit.

Gjatë vizitës, Hita uroi punonjësit për shërim të shpejtë dhe vlerësoi profesionalizmin e treguar gjatë kryerjes së detyrës.

“Të uroj shërim sa më të shpejtë ty dhe kolegut tjetër, i cili fatmirësisht është më mirë dhe është larguar pranë banesës. Keni treguar përgjegjësi dhe profesionalizëm në kryerjen e detyrës”, u shpreh Drejtori i Përgjithshëm.

Ai theksoi se sakrifica dhe përkushtimi i çdo punonjësi policie do të vlerësohen maksimalisht, duke garantuar mbështetje të plotë për trajtimin mjekësor dhe financiar të efektivëve të dëmtuar në krye të detyrës.

“Sakrifica dhe përkushtimi i çdo punonjësi Policie do të vlerësohet maksimalisht nga unë, si Drejtor i Përgjithshëm, dhe do të jem përherë në krahun tuaj, sepse në këtë krah janë edhe qytetarët e ndershëm që na besojnë dhe na mbështesin. Të shkuara dhe rri i qetë, sepse janë marrë të gjitha masat për trajtimin tuaj mjekësor dhe për trajtimin financiar nga Policia e Shtetit, pasi jeni dëmtuar në krye të detyrës”, tha Hita.

Hetimet për dokumentimin e plotë të aktivitetit kriminal vijojnë nga strukturat përkatëse të Policisë dhe Prokurorisë.