U prezantua si toger policie dhe i mori 450 euro një gruaje, arrestohet i dyshuari në Fushë Kosovë

Një person është arrestuar në Fushë Kosovë, pasi dyshohet se është prezantuar rrejshëm si toger i Policisë së Kosovës dhe i ka marrë 450 euro një gruaje, siç njofton Telegrafi duke iu referuar raportit 24-orësh të Policisë së Kosovës.

Sipas raportit policor, rasti ka ndodhur të enjten, në orën 15:55, në rrugën “Dardania” në Fushë Kosovë, ndërsa viktima e ka raportuar të premten, më 16 tetor. I dyshuari e kishte kontaktuar gruan përmes telefonit duke u prezantuar si zyrtar-toger i policisë dhe i kishte kërkuar që t’i jepte një personi tjetër shumën prej 450 eurosh, sipas tij për blerjen e peletit.

Viktima, duke besuar se po komunikonte me një zyrtar policor, i kishte dorëzuar paratë, ndërsa i dyshuari ishte larguar në drejtim të panjohur me një veturë. Siç bën të ditur policia në raport, vetura ishte marrë me qira ditë më parë në Gjilan nga një qytetar tjetër, të cilit i dyshuari nuk ia kishte kthyer.

Pas veprimeve hetimore, njësitet policore e kanë identifikuar, ndaluar dhe arrestuar të dyshuarin, së bashku me veturën që dyshohet se po e keqpërdorte. Me vendim të prokurorit, i dyshuari është dërguar në mbajtje për procedura të mëtejshme ligjore.