UASHIGTON – Xi: Me SHBA-në duhet të jemi partnerë, jo rivalë

UASHINGTON, 24 shtator /ATSH-ANSA/ – Kam kënaqësinë të zhvilloj një vizitë shtetërore në Shtetet e Bashkuara me ftesë të Presidentit Donald Trump. Në emër të popullit kinez, u përcjell përshëndetjet e mia të sinqerta dhe urimet më të mira popullit amerikan, deklaroi Presidenti Xi Jinping në një mesazh të publikuar nga trupi diplomatik i Pekinit pas mbërritjes së tij në Uashington.

Kina dhe Shtetet e Bashkuara janë të dyja kombe të mëdha me popuj të mëdhenj. Të dyja vendet duhet të jenë partnerë, jo kundërshtarë,dhe rilindja e madhe e kombit kinez dhe rikthimi i madhështisë amerikane mund të arrihen njëkohësisht, në dobi të ndërsjellë dhe për të mirën e gjithë botës”, theksoi ai.

Xi shtoi se synon të zhvillojë diskutime mbi “çështje të rëndësishme” — përfshirë “situatën globale” — me homologun e tij amerikan, Trump.

“Pres me padurim një shkëmbim të thelluar me presidentin Trump mbi çështjet kryesore që lidhen me marrëdhëniet tona dypalëshe dhe situatën globale, si dhe pasurimin e mëtejshëm të përmbajtjes së marrëdhënies sonë konstruktive të qëndrueshmërisë strategjike”, tha Xi.

Vizita nis me një shtrëngim duarsh me Trumpin

Donald Trump e priti Xi Jinping-un drejtpërdrejt në pistën e Bazës së Përbashkët Andrews — një gjest shumë i rrallë për kreun e Shtëpisë së Bardhë ndaj një lideri të huaj.

Të dy shtrënguan duart në prani të zonjave të para përkatëse, Melania Trump dhe Peng Liyuan, të rrethuar nga një gardë nderi e përbashkët, e mbledhur për ceremoninë e pritjes. Në pistë ishin rreshtuar gjithashtu një sërë avionësh ushtarakë amerikanë.