Ulqin: Arrestohet 49-vjeçari për shitje droge, ishte ndaluar edhe javën e kaluar për të njëjtën vepër

Policia e Ulqinit ka arrestuar A. U. (49) nga Ulqini, i dyshuar për prodhim të paautorizuar, mbajtje dhe vënie në qarkullim të drogave narkotike, siç njofton RTCG.

Sipas Drejtorisë së Policisë së Malit të Zi, duke vepruar me urdhër të gjykatës kompetente, punonjësit e policisë kontrolluan objektin që A. U. përdor dhe në të cilin banon, ku gjetën kokainë dhe disa qese PVC të destinuara për paketimin dhe shitjen e narkotikëve.

Sipas policisë, A. U. është përsëritës në kryerjen e veprave penale nga fusha e abuzimit me drogën dhe ishte arrestuar edhe javën e kaluar nën dyshimin se kishte kryer të njëjtën vepër penale.

Për ngjarjen është njoftuar prokurori i shtetit në Prokurorinë e Lartë Shtetërore në Podgoricë, i cili është shprehur se në veprimet e A. U. përmbushen elementet e veprës penale të prodhimit të paautorizuar, mbajtjes dhe vënies në qarkullim të drogave narkotike.

Nga A. U. janë sekuestruar përkohësisht, për kontrolle të mëtejshme, dy motoçikleta, një BMW dhe një SYM.