“Unë dhe familja morëm qindra kërcënime me jetë”, Fatos Geci paralajmëron ankesë te Kryeprokurori

Deputeti i Kuvendit të Kosovës nga radhët e LVV-së, Fatos Geci, ka bërë të ditur se do t’i drejtohet me ankesë zyrtare Kryeprokurorit të Shtetit, pasi, sipas tij, tri ditë pas kallëzimit lidhur me gjuhën e urrejtjes dhe shpifjen, nuk ka marrë informacione nga Policia e Kosovës dhe Prokuroria për veprimet e ndërmarra.

Në një reagim publik, Geci ka thënë se nuk është njoftuar nëse institucionet kanë ndërmarrë hapa lidhur me rastin, apo nëse Lirim Mehmetaj, të cilit i referohet si “gazetar” është thirrur për intervistim lidhur me një postim pas të cilit sipas Gecit ai dhe familja e tij kanë marrë qindra kërcënime me jetë.

Geci ka ngritur pikëpyetje për mungesën e një përgjigjeje institucionale, duke kërkuar që gjuha e urrejtjes, shpifjet dhe nxitja të trajtohen me seriozitet nga organet e drejtësisë.

Në reagimin e tij, deputeti ka përmendur edhe ngjarje të rënda të së kaluarës, duke kujtuar vitin 2000 dhe shkrimet e publikuara në gazetë përmes të cilave sipas tij ai dhe të tjerët etiketoheshin si tradhtarë.

Ai ka përmendur gjithashtu vrasjen e Besim Dajakut dhe gazetarit Bekim Kastrati në vitin 2001, si dhe plagosjen e Gani Gecit, duke i cilësuar këto ngjarje si plagë të rënda që dëshmojnë rëndësinë e trajtimit të gjuhës së urrejtjes dhe nxitjes.

Deputeti ka bërë të ditur se përmes ankesës zyrtare do të kërkojë sqarime për mënyrën se si është trajtuar kallëzimi i tij dhe arsyet pse, sipas tij, ende nuk është njoftuar për veprimet e mundshme hetimore.

“Siguria ime dhe e familjes sime nuk është çështje politike. Është çështje e sundimit të ligjit dhe e përgjegjësisë institucionale”, ka deklaruar Geci.

Ai ka theksuar se nuk kërkon trajtim të privilegjuar për shkak të pozitës së tij si deputet, por zbatimin e barabartë të ligjit dhe reagimin e institucioneve ndaj rasteve që mund të rrezikojnë jetën dhe sigurinë e qytetarëve.

Deri në këtë reagim, në deklaratën e publikuar nga Geci nuk jepen detaje për identitetin e personit ndaj të cilit është bërë kallëzimi, ndërsa nuk paraqitet as ndonjë përgjigje nga Policia e Kosovës apo Prokuroria lidhur me pretendimet e tij. /Telegrafi/