Vaj palme i padeklaruar në 46 produkte qumështi në Kosovë

Autoritetet e sigurisë ushqimore në Kosovë kanë identifikuar vaj palme të padeklaruar në 46 produkte të sektorit të qumështit, pas një kontrolli të gjerë të kryer në treg. Rezultatet e kontrolleve u prezantuan nga Ministria e Bujqësisë, Pylltarisë dhe Zhvillimit Rural dhe Agjencia e Ushqimit dhe Veterinarisë.

Sipas të dhënave të bëra publike, nga 471 mostra të analizuara, 93 rezultuan me mospërputhje në nivel përbërësish. Kjo përfaqëson rreth 19.8% të mostrave të analizuara. Nga këto raste, 46 lidhen me praninë ose deklarimin e vajit të palmës, duke e bërë këtë përbërës mospërputhjen më të shpeshtë të identifikuar gjatë kontrolleve.

Vaji i palmës u gjet në produkte të ndryshme, përfshirë gjizë, qumësht, ajkë, kremra ushqimorë, kos, produkte me speca dhe margarinë. Në një pjesë të rasteve, prania e tij nuk ishte deklaruar në etiketën e produktit.Kontrollet evidentuan gjithashtu raste kur në produkte ishin përdorur yndyra bimore pa u deklaruar, si dhe raste kur operatorët nuk kishin autorizimet e posaçme për përpunimin e produkteve që përmbajnë vaj palme, qumësht pluhur, yndyrë bimore ose përbërës të tjerë zëvendësues.

Në total, autoritetet morën 495 mostra nga kategori të ndryshme të produkteve. Numri më i madh i mostrave i përkiste djathit dhe gjizës, me 113 raste, të ndjekura nga qumështi dhe pijet me bazë qumështi me 94 mostra dhe ajka e kremi i qumështit me 83 mostra.Kontrollet përfshinë gjithashtu 75 mostra produktesh të ndryshme, 67 mostra margarine dhe yndyrash bimore, 57 mostra kosi dhe gjashtë mostra gjalpi.

Agjencia e Ushqimit dhe Veterinarisë tha se, pas evidentimit të mospërputhjeve, operatorëve ekonomikë u është kërkuar korrigjimi i deklarimit të produkteve dhe pajisja me autorizimet përkatëse.Operatorëve u është kërkuar gjithashtu ndarja fizike e produkteve me origjinë shtazore nga ato që përmbajnë përbërës me origjinë bimore. Sipas Agjencisë, në rastet ku janë konstatuar mospërputhje serioze, janë ndërmarrë masa administrative.