Vaksina e personalizuar kundër melanomës, studimi konfirmon uljen e rrezikut të rikthimit me 42%

– Një vaksinë e personalizuar kundër kancerit të lëkurës, e bazuar në teknologjinë mRNA, ka treguar rezultate premtuese në uljen e rrezikut të rikthimit të sëmundjes.

Studio i fundit i fazës së tretë ka konfirmuar efektivitetin e saj kundër melanomës, duke hapur perspektiva të reja në trajtimin e kësaj forme të kancerit.

Sipas rezultateve të studimit INTerpath-001, të prezantuara në seancën plenare të Kongresit të Shoqatës Evropiane të Onkologjisë Mjekësore (ESMO), vaksina e personalizuar, e kombinuar me imunoterapinë, ka ulur me 42% rrezikun e rikthimit të sëmundjes pas dy vitesh, krahasuar me trajtimin vetëm me pembrolizumab.

Ndërkohë, rreziku i shfaqjes së metastazave në organe të tjera është reduktuar me 38%.

Studimi përfshiu 1 137 pacientë me melanoma me rrezik të lartë, në 157 qendra mjekësore në mbarë botën.

Terapia e re përdoret pas ndërhyrjes kirurgjikale, me synimin për të parandaluar rikthimin e sëmundjes.

Vaksina e personalizuar

Risia e kësaj metode qëndron në faktin se vaksina (mRNA-4157) krijohet posaçërisht për çdo pacient, duke u bazuar në mutacionet specifike të tumorit të tij.

Në këtë mënyrë, sistemi imunitar udhëzohet të njohë dhe të sulmojë qelizat kancerogjene.

Sipas të dhënave të publikuara, në Itali rreth 5 mijë pacientë në vit mund të jenë kandidatë për këtë trajtim, nga rreth 13 mijë raste të reja me melanoma që diagnostikohen çdo vit.

Rezultatet përfundimtare të studimit pritet të publikohen në muajin nëntor në revistën shkencore New England Journal of Medicine.