Vettingu e shkarkoi, pas fitores në Strasburg rikthehet në sistem! Antoneta Sevdari zgjidhet anëtare e KLP-së nga radhët e

Antoneta Sevdari është zgjedhur anëtare e Këshillit të Lartë të Prokurorisë (KLP) nga radhët e Prokurorisë së Përgjithshme.

Gjithashtu, nga radhët e Apelit u zgjodh prokurorja Afërdita Ndoi.

Kujtojmë se Sevdarasi, ish-prokurore e Krimeev të Rënda, u shkarkua nga Vettingu, por fitoi gjyqin në Strasburg pas një beteje të gjatë, kurse tani rikthehet sërish në sistem, por jo si magjistratë, por si anëtare e KLP-së.

Lajmi është bërë i ditur nga gazetarja e Top Channel Anila Hoxha.

Sevdari është magjistratja e parë në Shqipëri që rikthehet në sistemin e drejtësisë pas përmbysjes së një vendimi të formës së prerë të vetingut, në një betejë që ajo e fitoi nga Gjykata Evropiane e Drejtave të Njeriut, në Strasburg.

Në mbledhjen që po mbahet sot në ambientet e Polit të Drejtësisë, pritet që të zgjidhet edhe një anëtar i ri i Këshillit të Lartë të Prokurorisë (KLP), nga radhët e prokurorisë, që do të zëvendësojë anëtarin Zeqir Hoda.

Sokol Stojani, përfaqësues i Prokurorisë së Përgjithshme; Ledina Riza, përfaqësuese e prokurorive të apelit; dhe Zeqir Hoda, përfaqësues i prokurorive të shkallës së parë përfunduan mandatet.

Ky proces i sotëm është mjaft i rëndësishëm, në një kohë kur ka ngecur procesi për vlerësimin e pesë kandidatëve për prokuror të Përgjithshëm.

Procesi për zgjedhjen e Prokurorit të Përgjithshëm u zhbllokua më 8 tetor 2026, pasi Këshilli i Lartë i Prokurorisë (KLP) rrëzoi me shumicë votash kërkesat e ndërsjella të kandidatëve për përjashtimin e anëtarëve të KLP-së nga vendimmarrja.

Në garë për këtë post janë pesë kandidatë:

–Adnan Xholi (prokuror i SPAK)

-Arta Marku (ish-Prokurore e Përgjithshme e Përkohshme)

-Fatjona Memçaj (prokurore në Eurojust)

-Rovena Zoto (prokurore në Tiranë)

-Ylli Pjetërnikaj (pedagog dhe prokuror)

Procesi kishte ngecur për disa javë për shkak të një zinxhiri kërkesash për përjashtim të anëtarëve të KLP-së (të iniciuara fillimisht nga kandidati Ylli Pjetërnikaj ndaj anëtarit Vatë Staka dhe më pas kërkesa të tjera të ngjashme mes anëtarëve).