Völler paralajmëron Gjermaninë: Asnjë iniciativë politike

Gjermania do të përqendrohet ekskluzivisht në aspektin sportiv të Kupës së Botës 2026 në Kanada, Meksikë dhe Shtetet e Bashkuara, duke shmangur çdo iniciativë apo qëndrim politik në prag të ndeshjeve. Drejtori sportiv i ekipit kombëtar, Rudi Völler, e deklaroi këtë, duke theksuar se konteksti politik i turneut “nuk duhet të ndërhyjë në përgatitjet dhe ndeshjet. Nuk do të ndodhë më që të nisen iniciativa politike ose të jepen intervista menjëherë para një ndeshjeje”, deklaroi Völler, duke iu referuar diskutimeve që u zhvilluan gjatë Kupës së Botës 2022 në Katar.

Në atë kohë, ekipi kombëtar gjerman ishte në qendër të vëmendjes për disa veprime simbolike, përfshirë gjestin e protestës nga lojtarët që mbuluan gojën në foton e ekipit para ndeshjes kundër Japonisë, në përgjigje të kufizimeve të FIFA-s për mbajtjen e shiritit të krahut me ngjyrat e ylberit. Völler theksoi se ekipi “nuk është apolitik”, por përsëriti se nuk mund të pritet që futbolli të zgjidhë problemet globale: “Ka shumë gjëra në botë që nuk na pëlqejnë. Edhe unë do të preferoja më shumë paqe kudo. Por futbolli nuk mund t’i zgjidhë ato. Ne jemi këtu për të luajtur një Kupë Bote. Kjo vjen e para”.

Menaxheri këmbënguli në nevojën për të ndarë sportin nga politika sa më shumë që të jetë e mundur. Së fundmi, Völler shprehu kundërshtimin ndaj thirrjeve për bojkot të turneut, duke përmendur përvojën e tij personale. “Edhe kur isha i ri, isha kundër bojkoteve”, tha ai, duke kujtuar Lojërat Olimpike të Moskës të vitit 1980: “Në atë kohë, mendoja se ishte gabim. Dhe nuk çoi në asgjë”.