Von der Leyen: Rrëzimi i raketës ruse në Poloni, një shkelje e papranueshme e hapësirës ajrore të BE-së

Presidentja e Komisionit Evropian, Ursula von der Leyen , e përshkroi rrëzimin e raketës ruse në Poloni si një tjetër “shkelje të papranueshme” të hapësirës ajrore të Bashkimit Evropian .

“Për t’i dhënë fund kësaj, ne po e ndihmojmë Ukrainën ta fitojë këtë luftë në çdo mënyrë që mundemi. Në të njëjtën kohë, ne po ndërtojmë një arkitekturë të fortë evropiane të sigurisë në tokë, në det dhe në ajër”, shkroi von der Leyen në një postim në platformën X.

Deklaratat e saj erdhën pasi kryeministri polak Donald Tusk njoftoi se objekti që ra gjatë natës në Poloninë lindore duket se ka qenë një raketë ruse, me autoritetet polake që vazhdojnë hetimin e tyre për identifikimin përfundimtar të tij dhe rrethanat e lëshimit të tij.

Kryeministri polak vizitoi vendin ku ra objekti dhe tha se nuk kishte asnjë tregues se vendi ishte destinacioni i raketës.

Fillimisht, Tusk raportoi se dy raketa shkelën hapësirën ajrore polake gjatë natës, duke sqaruar se njëra u kthye shpejt mbi Ukrainë.

Megjithatë, pak më vonë, Ministri i Mbrojtjes Władysław Kościńska-Kamiś sqaroi se vetëm një raketë hyri në hapësirën ajrore polake.

Kryeministri polak konfirmoi gjithashtu se provat fillestare tregojnë se raketa që u rrëzua në një zonë rurale ishte një raketë ruse Kh-101.

“Nuk ka arsye për të besuar se Polonia ishte objektivi i synuar i kësaj rakete”, theksoi ai.

Në të njëjtën kohë, ai zbuloi se Forcat Ajrore Polake ishin gati të rrëzonin raketën, pasi ekzistonte rreziku që ajo të godiste një zonë banimi.

Tusk shtoi gjithashtu se Shtetet e Bashkuara kanë shprehur interes për të marrë pjesë në hetimin e incidentit.