Votimi për Komisionin e Prokurimit Publik ngre pikëpyetje, katër kandidatë siguruan shumicën

Paqartësi në votimin e së enjtes në parlament për anëtarët e Komisionit të Prokurimit Publik. Mes 21 kandidaturave duhet të zgjidheshin vetëm 3 emra, për tre vende vakante. Rendi i ditës i seancës, i publikuar zyrtarisht nga Kuvendi, saktësonte se për emërimin nevojitej “shumicë e thjeshtë votash për miratim”. Por rezultati i votimit rezervoi një të papritur. Shumicën e thjeshtë e kishin garantuar jo 3 por katër kandidatura.

Grupi parlamentar socialist ishte udhëzuar nga drejtuesit e tij që të ofronte mbështetjen për Edvin Simon, Donika Dacin dhe Nertil Kaninën të cilët në fakt morën secili nga 73 vota. Por situata duket se u doli nga duart, pasi fill pas tyre, kandidatura e Xhovan Gjinit mori 44 vota në favor, 34 abstenime dhe 6 kundër, që do të thotë me shumë se gjysmën e 84 deputetëve që morën pjesë në votim.

Megjithatë kryetari i Kuvendit Niko Peleshi pas këtij rezultati u shpreh se “projektvendimi nuk miratohet”. Edhe në njoftimin më pas për vendimet e marra në seancë, përfshihen vetëm emrat e tre kandidatëve të parë.

Burime nga Kuvendi thanë se u miratuan ata që kishin marrë me shumë vota, dhe se kjo ishte një praktikë e konsoliduar në përzgjedhjen e anëtarëve të bordeve, por pa specifikuar nëse një praktikë e tillë mbështetej në një bazë ligjore.

Rregullorja e Parlamentit, në nenin 55 të saj, pika 3, parashikon se “Aktet e Kuvendit konsiderohen të miratuara kur për to kanë votuar “pro” shumica e deputetëve të pranishëm, me përjashtim të rastit kur kërkohet shumicë e cilësuar, sipas parashikimit në Kushtetutë ose në ligj”.