Vrasja e policit në Maliq, reagon ministri i Brendshëm: Dënoj me forcën më të madhe këtë akt kriminal

Ministri i Brendshëm, Besfort Lamallari, ka reaguar pas ngjarjes së rëndë të ndodhur në Maliq, ku një efektiv policie u vra dhe një tjetër mbeti i plagosur gjatë një operacioni për kapjen e një personi të shpallur në kërkim për trafik të lëndëve narkotike.

Përmes një reagimi publik, Lamallari shprehu ngushëllimet për familjen e efektivit të ndjerë, duke e cilësuar humbjen si një goditje të rëndë për Policinë e Shtetit dhe për vendin.

“Sot një familje humbi njeriun e saj të dashur, Policia e Shtetit humbi një koleg, Shqipëria humbi një shërbëtor të përkushtuar të ligjit”, u shpreh ministri.

Ai dënoi me forcë sulmin ndaj efektivëve të policisë, duke e konsideruar atë një akt kriminal që cenon rendin, ligjin dhe sigurinë e qytetarëve.

“Dënoj me forcën më të madhe këtë akt kriminal të rëndë në Maliq, një sulm jo vetëm ndaj punonjësve të Policisë së Shtetit, por ndaj vetë rendit, ligjit dhe sigurisë së qytetarëve. Autori do të përballet me të gjithë forcën e ligjit dhe nuk do të ketë asnjë mundësi t’i shpëtojë drejtësisë”, deklaroi Lamallari.

Në reagimin e tij, Lamallari uroi shërim të shpejtë edhe për efektivin e plagosur, Edison Adri.

“Efektivit të plagosur, Edison Adri, i uroj shërim të shpejtë dhe rikthim sa më parë pranë familjes dhe kolegëve të tij”, përfundoi ministri i Brendshëm.