Vuçiç për anulimin e vizitës së von der Leyen: ‘Mënyrë elegante’ për ta hequr Serbinë nga turneu ballkanik

Presidenti i Serbisë, Aleksandar Vuçiç, e cilësoi sot si “një mënyrë elegante” vendimin e Brukselit për të anuluar vizitën e presidentes së Komisionit Evropian, Ursula von der Leyen, në Serbi, me arsyetimin e mbajtjes së zgjedhjeve në fund të tetorit.

I pyetur nga gazetarët në margjinat e Samitit të Iniciativës Karpatike në Ukrainë për anulimin e vizitës së von der Leyen në Serbi dhe në Bosnjë-Hercegovinë, Vuçiç tha se “ata gjetën një mënyrë elegante për të thënë se kjo është për shkak të zgjedhjeve”.

“Unë mendoj se Ursula (von der Leyen) është tepër e mençur dhe e zgjuar për të pasur iluzione, ose për të mos e ditur se cili është opinioni publik në Serbi. Jam i sigurt se ajo e di mirë”, theksoi presidenti serb.

Presidentja e Komisionit Evropian, në kuadër të turneut në Ballkanin Perëndimor që do të mbahet nga 30 shtatori deri më 2 tetor, ishte parashikuar të vizitonte Shqipërinë, Malin e Zi, Maqedoninë e Veriut, Serbinë, Kosovën dhe Bosnjë-Hercegovinën. Por, sipas njoftimit të BE-së, për shkak të mbajtjes së zgjedhjeve në Serbi dhe në Bosnjë-Hercegovinë, von der Leyen do t’i anashkalojë këto dy vende.

Ky reagim i Vuçiçit vjen pasi 24-ore.com publikoi më herët sot lajmin për vendimin e Brukselit për ta hequr Beogradin dhe Sarajevën nga axhenda e turneut, ndërsa tani është raportuar edhe reagimi i ri zyrtar i presidentit serb.

Burimi: Nova.rs