Zbulohen dy lokale ku organizoheshin lojëra fati, arrestohen 4 persona në Tiranë! Procedohet një tjetër

Policia e Tiranës ka goditur 2 raste të tjera të aktivitetit të paligjshëm të lojërave të fatit në lokale. Lidhur me këtë operacion mësohet se janë vënë në pranga 4 persona dhe është proceduar penalisht një tjetër.

Policia thekson se tre prej te arrestuarve u kapën në rrugën “Gjergj Legisi” në një lokal duke luajtur “Poker”. Lokali ishte në pronësi të një 58-vjeçari i cili është mes personave të arrestuar. I arrestuari tjetër u kap në lokalin e tij në Vaqarr. Gjatë këqyrjes së celularit të tij iu gjetën aplikacione që dyshohet se përdoreshin për lojëra fati.

“Tiranë/Finalizohet operacioni i koduar “Fati i lojërave”. Goditen 2 raste të tjera të zhvillimit të aktivitetit të paligjshëm të lojërave të fatit, në lokale. Vihen në pranga 4 shtetas, procedohet penalisht 1. Sekuestrohen tavolina pokeri, celularë dhe shuma parash.

Shërbimet e komisariateve të Policisë Nr. 3 dhe Nr. 6, bazuar në informacionet e siguruara në rrugë operative, në kuadër të operacionit “Fati i lojërave”, për organizmin e lojërave të fatit në ambiente të vëna në dispozicion për këtë veprimtari të paligjshme, kanë vijuar kontrollet dhe kanë zbuluar 2 ambiente të tilla.

Në vijim të veprimeve procedurale, u vunë në pranga shtetasit: -N. P., 58 vjeç, A. K, 42 vjeç dhe L. P., 52 vjeç, si dhe u procedua penalisht shtetasi M. Q., pasi në rrugën “Gjergj Legisi”, Tiranë, janë konstatuar në ambientet e lokalit në pronësi të shtetasit N. P., duke luajtur lojën “Poker”;

-E. K, 22 vjeç, pasi në lokalin e tij, në Vaqarr, gjatë këqyrjes së celularit iu gjetën aplikacione që dyshohet se përdoreshin për lojëra fati. Materialet procedurale iu referuan Prokurorisë së Tiranës, për veprime të mëtejshme”, njofton policia.