Zbulohet shkaku i vdekjes së aktores Daveigh Chase

Është konfirmuar shkaku i vdekjes së aktores amerikane Daveigh Chase, e cila u nda nga jeta në moshën 35-vjeçare pas një beteje të papritur me shëndetin.

Sipas raportimeve, Chase humbi jetën si pasojë e meningjitit dhe një infeksioni të rëndë në gjak, i cili shkaktoi sepsë dhe më pas dështim të organeve.

Aktorja ishte shtruar fillimisht në një spital në Los Angeles për shkak të kequshqyerjes, por gjendja e saj u përkeqësua me shpejtësi pasi zhvilloi infeksionin në gjak. Më vonë, mjekët konfirmuan se meningjiti ishte shkaku i vdekjes së saj.

Lajmin e hidhur e konfirmoi partneri i saj, Roy Hernandez, i cili pak ditë para ndarjes së saj nga jeta kishte hapur një fushatë në GoFundMe për të mbuluar shpenzimet e kujdesit mjekësor.

Në mesazhin e publikuar në platformë, ai zbuloi se Daveigh kishte kaluar një fëmijëri të vështirë dhe vitet e fundit ishte distancuar nga familja pas një konflikti të dhimbshëm.

“Gjendja e saj është bërë kritike dhe mjekët më kanë thënë se mund të mos i ketë mbetur shumë kohë. Gjithçka që ajo dëshironte ishte një vend ku të jetonim së bashku, të ndiheshim të sigurt dhe të lumtur,” shkruante Hernandez pak para vdekjes së saj.

Daveigh Chase u bë e njohur në vitin 2002 si zëri i Lilo-s në filmin e animuar “Lilo & Stitch”, ndërsa po atë vit interpretoi rolin e paharrueshëm të Samara Morgan në filmin horror “The Ring”, për të cilin fitoi çmimin MTV Movie Award si “Villania më e mirë”.

Karriera e saj përfshiu gjithashtu role në “Spirited Away”, “Big Love”, “Donnie Darko”, “ER” dhe “Sabrina the Teenage Witch”. Roli i saj i fundit në ekran ishte në filmin e pavarur “American Romance” në vitin 2016.