Zelenski: pilotët ukrainas do të nisin së shpejti trajnimin me avionët francezë Rafale

Presidenti ukrainas Volodymyr Zelenski njoftoi se pilotët ukrainas do të nisin së shpejti trajnimin me avionët luftarakë francezë Rafale në Francë — një hap të cilin ai e cilësoi “të rëndësishëm përpara për aviacionin luftarak të Ukrainës”, siç njofton The Kyiv Independent. Lajmi u bë i ditur pas telefonatave që Zelenski zhvilloi më 5 tetor me presidentin francez Emmanuel Macron dhe kryeministrin polak Donald Tusk.

Sipas Zelenskit, Macron e informoi se Franca po përgatit një paketë të re ndihme mbrojtëse për Ukrainën, e cila pritet “së shpejti”. Premtimi vjen në një moment kur Rusia po vazhdon sulmet masive ajrore ndaj qyteteve ukrainase, përpara një vale tjetër të pritur bombardimesh.

Kievi njoftoi gjatë vitit 2025 se synon blerjen e 100 avionëve Rafale. Rafale, prodhim i kompanisë franceze Dassault Aviation, është një gjuajtës shumërolësh i gjeneratës 4.5 dhe konsiderohet ndër avionët luftarakë europianë më të avancuar. Franca i ka furnizuar Ukrainës raketa me rreze të gjatë veprimi dhe e ka mbështetur me informacion inteligjence, ndërsa të dy palët po punojnë për prodhimin vendas në Ukrainë të raketave dhe bombave ajrore franceze. Parisi është gjithashtu i angazhuar në “Freyja”, projektin e përbashkët europian të mbrojtjes kundër raketave balistike të udhëhequr nga kompania ukrainase e mbrojtjes Fire Point.

Zelenski konfirmoi se detajet e programit do të diskutohen me Macronin në një takim ballë për ballë, për të cilin nuk është caktuar ende një datë.

Në telefonatën me kryeministrin polak Donald Tusk, dy udhëheqësit diskutuan përgatitjet për bisedimet teknike trepalëshe Ukrainë–SHBA–Rusi, të cilat Uashingtoni po shtyn të mbahen deri në fund të tetorit. “Nuk ka pengesa nga ana jonë”, tha Zelenski. Në rend të ditës ishin edhe përgatitjet dimërore, ndërsa Rusia po godet infrastrukturën energjetike të Ukrainës. Tusk dhe Zelenski ranë dakord për një takim të afërt; takimi i tyre i fundit u mbajt më 18 shtator, në Samitin e Karpatet 8.

Zelenski bisedoi po atë ditë edhe me kryeministrin holandez Rob Jetten, me të cilin diskutoi forcimin e mbrojtjes ajrore ukrainase. Një pjesë e konsiderueshme e dronëve rusë rrëzohen nga avionët F-16 që Holanda i ka transferuar Ukrainës, tha presidenti ukrainas.