Zjarri në Vlorë, 25-vjeçarja me djegie të rënda dërgohet në Turqi. Shpenzimet mbulohen nga shteti shqiptar

Pacientja 25-vjeçare A.D., e cila dy ditë më parë pësoi djegie të rënda në rreth 85% të sipërfaqes së trupit, pas zjarrit të rënë në një hotel në zonën e Lungomares në Vlorë, është nisur drejt Turqisë për të vijuar trajtimin mjekësor.

Pacientja qëndroi në Qendrën Spitalore Universitare “Nënë Tereza”, ku mori trajtim intensiv nga ekipet mjekësore të terapisë intensive.

Sipas QSUT-së, pas përfundimit të procedurave mjekësore dhe administrative, transferimi i pacientes drejt Turqisë u realizua në bashkëpunim me Ambasadën e Turqisë dhe autoritetet shëndetësore turke.

25-vjeçarja do të vijojë trajtimin në një spital të specializuar në Turqi, ku do të marrë kujdesin e nevojshëm për shkak të rëndësisë së plagëve të shkaktuara nga zjarri.

Shpenzimet e trajtimit jashtë vendit do të mbulohen nga shteti shqiptar, përmes Ministrisë së Shëndetësisë dhe Mirëqenies Sociale.

Zjarri ra dy ditë më parë, ku flakët nisën në katin e parë të godinës, ku ndodhej restoranti, dhe më pas u përhapën me shpejtësi drejt kateve të sipërme, ku ndodheshin dhomat e hotelit.

Në total, 6 persona mbetën të plagosur nga zjarri. Pesë prej tyre ishin shtetas nga Kosova, ndërsa një tjetër nga Rrësheni.