Ekonomia

KESH blen energji për shtatorin. OSHEE, pjesën tjetër

Korporata Elektroenergjetike Shqiptare bleu 115 mijë megavat energji elektrike, përmes kredisë së dhënë nga Banka Botërore. Sipas njoftimit zyrtar, çmimi mesatar i blerjes rezultoi 62.33 euro për megavat, duke bërë që KESH të shpenzojë rreth 7.2 milionë euro.
Energjia do të përdoret për të përballuar konsumin e muajit shtator. Paralelisht me të, edhe Operatori i Shpërndarjes së Energjisë Elektrike ka hapur tender për të blerë një sasi tjetër prej 274 mijë megavat, që do të përdoret po për muajin shtator.
Shqipëria po përballet me një situatë të pafavorshme hidrike, për shkak të thatësirës së gjatë. Uji në basenin e hidrocentralit të Fierzës ka rënë në nivelet më minimale, duke bërë që të dalin rrënojat e ish-zonave të banuara.
Në dy muajt e fundit, vendi ka importuar mbi 52 milionë euro energji elektrike nga jashtë, të cilat janë financuar nga fondet e Operatorit të Shpërndarjes së Energjisë.
Por, plani për rimëkëmbjen e sektorit të energjisë, i hartuar nga qeveria me Bankën Botërore në vitin 2014, parashikon se në situata të jashtëzakonshme, një pjesë e kostos për importet do të përballohet nga KESH.
Për këtë qëllim, Banka Botërore i ka akorduar një fond 23 milionë euro Korporatës, i cili do të përdoret në 3 muaj.

Related Articles

Leave a Reply

Your email address will not be published. Required fields are marked *

Back to top button