56 studentë të helmuar, PD: Pasojë e korrupsionit qeveritar – Tv Klan

Helmimi i 56 studentëve të Akademisë së Sigurisë për Partinë Demokratike është rezultat I sitemit të korruptuar në tenderat publikë.

Në një deklaratë për këtë ngjarje , zëdhënësja e Antikorrupsionit në PD, Genta Vangjeli akuzoi qeverinë se ka fryrë kostot e kontratave për shërbimin e gatimit në Akademinë e Sigurisë.

“Në vitin 2019, Agjencia e Blerjeve të Përqendruara pranë Ministrisë së Brendshme prokuroi shërbimin e gatimit dhe shpërndarjes së ushqimit për Akademinë e Sigurisë me rreth 47 mijë euro në muaj, ose 1.7 milion euro për tre vite. Ndërsa në tenderin e fundit të vitit 2025, të zhvilluar nga Operatori i Blerjeve të Përqendruara, përveç një garë fiktive, ku nga tre operatorë pjesëmarrës, vetëm fituesi paraqiti ofertë reale dhe dokumentacion, ndërsa dy të tjerët nuk dorëzuan asgjë dhe u skualifikuan, për të njëjtin objekt u prokuruan pothuajse 80 mijë euro në muaj, ose 2.8 milion euro për tre vite”, tha Vangjeli.

PD kërkon hetim të plotë të kësaj ngjarjeje.

“Pyetja që shtrohet sot është e thjeshtë: ku shkuan milionat shtesë të shqiptarëve? Kush përfitoi nga fryrja me gati 70% e këtyre kontratave? A po përdoren këto tendera si skema korruptive për të mbushur xhepat e ministrave dhe drejtorëve të Edi Ramës, ndërkohë që studentëve u jepet ushqim që i çon në spital? Partia Demokratike kërkon hetim të plotë dhe transparent për këtë skandal, si dhe mbajtjen e përgjegjësisë penale dhe administrative për çdo zyrtar të përfshirë në këto prokurime abuzive që rrezikojnë jetën dhe shëndetin e qytetarëve”, theksoi Vangjeli.

Hetimet për ngjarjen po vijojnë, ndërsa policia arrestoi kuzhinierin, teknologen dhe shpalli në kërkim administratoren e kompanisë së shëpërndarjes së ushqimit.

Klan News

/tvklan.al