Aksident tragjik në aksin Kardhiq–Delvinë, 1 i vdekur dhe 3 të plagosur

Një aksident i rëndë rrugor ka ndodhur mëngjesin e kësaj të premteje, më 5 qershor, në aksin Kardhiq–Delvinë, në vendin e njohur si Fusha e Vërrit të Delvinës.

Sipas informacioneve paraprake, në aksident janë përfshirë dy automjete. Njëri prej mjeteve, me targa AA 246 RC, ka dalë nga rruga dhe është përmbysur, ndërsa automjeti tjetër, një Audi me targa AB 558 XR, ka pësuar dëmtime të shumta nga përplasja.

Gazetarja e Klan News Greta Haskaj raporton se si pasojë, një person ka humbur jetën, ndërsa tre të tjerë kanë mbetur të plagosur dhe janë transportuar për ndihmë mjekësore në spital.

Në vendngjarje kanë mbërritur menjëherë shërbimet e Policisë, ambulancat dhe forcat zjarrfikëse, të cilat kanë ndërhyrë për nxjerrjen e personave të aksidentuar nga mjeti dhe menaxhimin e situatës.

Grupi hetimor ndodhet në terren dhe ka nisur veprimet për zbardhjen e plotë të rrethanave dhe shkaqeve që çuan në këtë aksident të rëndë.

/tvklan.al