Alarm për rrëmbim në një avion me 180 pasagjerë, Izraeli ngre në ajër avionët luftarakë

Autoritetet izraelite aktivizuan protokollet e sigurisë pasi një pilot i linjës ajrore bullgare Electra Airways, që po kryente një fluturim nga Varshava drejt Tel Avivit, aktivizoi aksidentalisht alarmin për rrëmbim nga kabina e pilotit.

Pak minuta më vonë, kapiteni i avionit njoftoi se nuk kishte asnjë incident sigurie në bord dhe se alarmi ishte aktivizuar për shkak të një gabimi njerëzor.

Megjithatë, autoritetet izraelite zbatuan procedurat standarde të sigurisë. Forcat Ajrore izraelite ngritën avionë luftarakë, ndërsa u vendos që avioni, në të cilin udhëtonin 180 pasagjerë, të mos vazhdonte fluturimin drejt Tel Avivit.

Sipas raportimeve, piloti kërkoi leje për t’u ulur në Qipro, por kërkesa u refuzua pasi aeroporti nuk kishte kapacitet për të pritur fluturimin për shkak të trafikut të lartë ajror.

Në përfundim, avioni u devijua drejt Sofjes, në Bullgari, ku bëri uljen.

Shërbimet izraelite të sigurisë bënë të ditur se nuk ka asnjë tregues që ngjarja të ketë qenë një incident real sigurie apo një akt terrorist, ndërsa alarmi rezultoi të ishte aktivizuar gabimisht.