ANEM dhe NUNS dënojnë kërcënimet ndaj gazetarit të N1-it: ‘Herën tjetër do të thyej kokën’

Shoqata e Mediave të Pavarura Elektronike (ANEM) dhe Shoqata e Pavarur e Gazetarëve të Serbisë (NUNS) dënuan sot kërcënimet e drejtuara ndaj gazetarit të televizionit N1, Mladen Savatoviç, në Sheshin Nikolla Pashiq në Beograd, ndërsa ai ishte në detyrë pune — dhe e denoncuan rastin në Prokurorinë Themelore Publike të Parë, siç shkruan gazeta Danas.

Në komunikatën e dy shoqatave thuhet se Savatoviç po priste lidhjen e drejtpërdrejtë kur iu afrua një burrë dhe i tha: “Sreća tvoja da sam sa ženom, sledeći put ću ti razbiti glavu” — “Me fat që jam me gruan, herën tjetër do të thyej kokën” — si dhe “Ja sam za ovu zemlju ratovao, a ti je uništavaš. Pazi se” — “Unë luftova për këtë vend, kurse ti e shkatërron. Kujdes”.

Kameramani i televizionit N1 arriti ta fotografonte sulmuesin, dhe fotografitë iu dorëzuan prokurorit. Në denoncim kërkohet reagim urgjent i prokurorisë për shkak të përdorimit të qartë të kërcënimeve me dhunë fizike me qëllim frikësimin e gazetarit.

Dy shoqatat theksojnë se ky rast është pjesë e një situate më të gjerë të krijimit të një narativi të dhunshëm dhe negativ ndaj gazetarëve që mbajnë qëndrim kritik ndaj veprimeve të pushtetit, veçanërisht ndaj gazetarëve të televizionit N1. Ato kërkojnë që prokurorët të shqyrtojnë hollësisht domethënien, peshën dhe pasojat e asaj që u tha, dhe të shohin edhe pamjet e kamerave përreth sheshit.