Anije në flakë pranë brigjeve të Irakut, UKMTO raporton incidentin 63 milje detare në juglindje të Al-Faw

Një anije ka marrë flakë në ujërat pranë brigjeve të Irakut, në pjesën veriore të Gjirit Persik, në një incident tjetër që ngre pyetje për sigurinë e lundrimit tregtar në rajon. Sipas raportimit të Reuters, agjencia britanike e operacioneve të tregtisë detare UKMTO njoftoi të hënën se ka marrë raporte nga palë të treta për një anije në flakë 63 milje detare në juglindje të Al-Faw, portit kryesor irakian në grykëderdhjen e Gjirit.

UKMTO nuk dha detaje të tjera për incidentin. Siç njofton Reuters, gjendja e ekuipazhit të anijes, shkalla e dëmeve të mundshme dhe ndikimi mjedisor i zjarrit mbeten ende të panjohura, ndërsa rrethanat e ngjarjes po hetohen.

Deri tani asnjë palë nuk ka marrë përgjegjësinë për incidentin dhe nuk është bërë e ditur as çfarë e shkaktoi zjarrin në bordin e anijes, as emri apo flamuri i saj. Al-Faw ndodhet në skajin verior të Gjirit Persik, jo shumë larg daljes drejt Ngushticës së Hormuzit, ku muajt e fundit janë raportuar një sërë sulmesh ndaj anijeve tregtare në kuadër të luftës mes Shteteve të Bashkuara dhe Iranit.

Incidenti vjen në një kohë kur trafiku detar në Gjirin Persik dhe në Hormuz mbetet nën presion të vazhdueshëm nga lufta, me pasoja direkte për eksportet e naftës dhe gazit nga vendet e rajonit drejt tregjeve botërore.