Ariana Grande dhe Ethan Slater i japin fund lidhjes pas tre vitesh

Ariana Grande dhe Ethan Slater janë ndarë pas tre vitesh lidhjeje, ka konfirmuar Page Six.

Sipas një burimi pranë çiftit, ndarja ka ndodhur disa muaj më parë, por të dy kanë mbetur në marrëdhënie miqësore.

“Ariana dhe Ethan u ndanë disa muaj më parë, por kanë mbetur miq dhe kanë respekt dhe vlerësim për njëri-tjetrin,” tha burimi. “Nuk ishte një vendim i lehtë, por kuptuan se është më mirë të jenë miq sesa në një marrëdhënie romantike.”

Burimi shtoi gjithashtu se Ariana është e fokusuar në karrierën e saj, turneun “Eternal Sunshine” dhe albumin e ri “Petal”, i cili pritet të publikohet së shpejti.

Dy artistët u njohën gjatë xhirimeve të filmit “Wicked”. Në atë kohë, të dy ishin të martuar: Grande me Dalton Gomez, ndërsa Slater me Lilly Jay, me të cilën ka një djalë 3-vjeçar.

Sipas raportimeve, marrëdhënia e tyre u bë publike në vitin 2023 dhe shkaktoi shumë reagime në media, veçanërisht nga ish-bashkëshortja e Slater.

Pavarësisht zhurmës mediatike, një burim tjetër kishte deklaruar më herët se “ata nuk kanë bërë asgjë të gabuar”, duke theksuar se Slater ishte i ndarë nga bashkëshortja e tij përpara lidhjes me Grande.

Ndërkohë, Ariana Grande po vijon turneun e saj të shumëpritur dhe së fundmi ka bërë edhe referenca  për jetën e saj personale gjatë performancave live, përfshirë këngën “Thank U, Next”.