Nis debati për amendamentet e ribalancimit të dytë të buxhetit: mbi 120 amendamente para Komisionit për financim dhe buxhet

Në Komisionin kuvendor për financim dhe buxhet nis sot debati për amendamentet e propozimit për ndryshimin dhe plotësimin e buxhetit të Maqedonisë së Veriut për vitin 2026, në lexim të dytë, siç njofton MIA. Për propozimin, i cili është ribalancimi i dytë i buxhetit për këtë vit, janë dorëzuar mbi 120 amendamente nga propozues të autorizuar.

Me ribalancimin e ri, të ardhurat totale planifikohen në 374,2 miliardë denarë, për rreth 5,3 miliardë denarë më pak se parashikimet e mëparshme. Pjesa më e madhe e korrigjimit ka të bëjë me akcizat, të cilat rishikohen nga 34,1 në 30,4 miliardë denarë, ndërsa deficiti mbetet në 46,3 miliardë denarë, ose 4,1 për qind e PBB-së.

Siç ka njoftuar ministrja e Financave, Gordana Dimitrieska-Koçoska, të ardhurat tatimore korrigjohen nga 213,3 në 209,8 miliardë denarë, përkatësisht ulen për 1,6 për qind. “Pjesa më e madhe e korrigjimit ka të bëjë me akcizat. Arsyeja është ulja e akcizave për benzinën dhe dizelin, masë me të cilën e zbusim drejtpërdrejt ndikimin e rritjes së çmimeve të derivateve të naftës te qytetarët dhe kompanitë”, ka thënë ajo, sipas MIA-s.

Sipas ministres, te të ardhurat jotatimore dhe donacionet parashikohet ulje prej rreth dy miliardë denarësh, e cila vjen tërësisht nga llogaritë e vetë shfrytëzuesve buxhetorë, për shkak të zgjatjes së realizimit të projekteve me vetëfinancim. Pritjet për tatimin mbi të ardhurat personale, tatimin mbi fitimin, TVSH-në dhe të ardhurat doganore mbeten të qëndrueshme.

Shpenzimet totale planifikohen në 420,5 miliardë denarë, për 5,3 miliardë më pak se parashikimet e mëparshme, me korrigjim prej rreth 5,7 miliardë denarësh te shpenzimet kapitale për shkak të zgjatjes së dinamikës së realizimit të disa projekteve, ndërsa sigurohen mjete shtesë për kategoritë e rrezikuara sociale dhe për shërbimet shëndetësore, siç njofton MIA.

Ministrja ka theksuar se, megjithëse PBB-ja në gjysmën e parë të vitit u rrit për 3,7 për qind, parashikimi i rritjes për vitin 2026 mbetet 3,5 për qind, nga kujdesi për shkak të konflikteve në Lindjen e Mesme dhe në Ukrainë. Shteti gjatë vitit 2026 duhet të servitojë detyrime prej gjithsej 76,6 miliardë denarësh, prej të cilave 55,1 miliardë janë borxh i jashtëm, 19,9 miliardë borxh i brendshëm dhe 1,6 miliardë dalje për kredi ndaj Bankës Zhvillimore.