ARKEOLOGJI – Greqia i kthen Bullgarisë eshtrat e car Samuilit

SOFJE, 29 shtator /ATSH-BTA/ – Greqia po i kthen Bullgarisë eshtrat e car Samuilit, tha sot kryeministri Rumen Radev në hapje të mbledhjes së përjavshme të qeverisë.

“Ne kemi arritur një marrëveshje historike për kthimin e eshtrave të car Samuilit”, tha ai duke shtuar se marrëveshja ishte rezultat i bisedimeve aktive mes dy vendeve.

Radev u bëri thirrje bullgarëve të marrin pjesë në një aktivitet në sheshin qendror ”Battenberg” të Sofjes më 3 tetor, për mbërritjen e eshtrave të carit dhe për t’i “bërë nderimet një sundimtari të madh bullgar”.

Në mëngjesin e së njëjtës ditë, ai do të jetë në Muzeun e Kulturës Bizantine në Selanik, ku, në një ceremoni të organizuar nga kryeministri i Greqisë, eshtrat e car Samuilit do t’i dorëzohen zyrtarisht shtetit bullgar.

Ato do të transportohen me një avion “Spartan” drejt Sofjes dhe do të vendosen në një sarkofag në kishën “Shën Sofia”, ku, si fëmijë, cari i ardhshëm i Bullgarisë u njoh me krishtërimin.

Eshtrat nga dy sarkofagë të tjerë të zbuluar në të njëjtën kishë do t’i dorëzohen gjithashtu Bullgarisë.

Besohet se ato i përkasin car Gavrail Radomirit dhe anëtarëve të tjerë të familjes mbretërore.

Në mbledhjen e sotme, qeveria do të miratojë tekstin e një marrëveshjeje mes Bullgarisë dhe Greqisë, duke autorizuar ministrin e Kulturës ta nënshkruajë atë së bashku me homologun e tij grek.

”Marrëveshja parashikon transferimin reciprok, për ruajtje, të objekteve historike, si edhe të objekteve dhe relikteve fetare e kulturore”, tha Radev.

“Përpjekjet e shtetit bullgar për të rikthyer eshtrat e car Samuilit datojnë që nga viti 1965, kur arkeologu i njohur grek në mbarë botën, prof. Nikolaos Moutsopoulos, i zbuloi ato gjatë gërmimeve në bazilikën e ndërtuar nga Samuili në ishullin Shën Achillios, në liqenin e Prespës së Vogël, ku Samuili kishte rezidencën e tij verore”, tha kryeministri.

Ai theksoi se për gjashtë dekada shteti bullgar nuk i kishte ndërprerë kurrë përpjekjet për të rikthyer eshtrat e car Samuilit.

“Ne kemi pasur nderin historik ta arrijmë këtë dhe dëshiroj t’i shpreh mirënjohjen time më të thellë kryeministrit të Greqisë mike, Kyriakos Mitsotakis, për vizionin shtetëror, kurajën politike dhe vendosmërinë për ta arritur së bashku këtë marrëveshje, e cila i forcon më tej lidhjet mes dy vendeve tona”, tha Radev.

Ai theksoi se sot kujtimi i Samuilit i bashkon dhe jo i ndan dy vendet, ndërsa anëtarësimi i tyre i përbashkët në BE ndihmon secilin vend të kuptojë më mirë ndjeshmëritë e tjetrit. /Ad.Ab./ a.jor.