Bashkëpunimi publik-privat, një ndër alternativat për financimin e Rrugës së Arbërit

Bashkëpunimi publik-privat shihet si një ndër alternativat për financimin e Rrugës së Arbërit, qe pritet të nisë vitin që vjen.

Qeveria po shqyrton dy mundësi, atë të financimit nga buxheti i shtetit dhe mundësinë e një partneriteti publik- privat. Por, burime nga ministria e Financave shprehen se po shihet mundësia e një financimi të përbashkët me biznesin privat.

Ekspertë të ministrisë së Transporteve bëjnë të ditur se ky dikaster ka çdo gjë gati për të nisur ndërtimin e Rrugës së Arberit dhe janë në pritje të fondeve.

Ndërtimi i Rrugës së Arbërit shkurton në mënyrë të ndjeshme distancat e transportit që lidhin Tiranën dhe portin e Durrësit me Dibrën, Peshkopinë, Matin, Shkupin. Rruga e Dibrës, e quajtur “Rruga e Arberit”, është e gjatë 75 kilometra. Rruga parashikohet të përshkohet me shpejtësi mesatare 80 kilometra në orë, duke mënjanuar në maksimum ngjitjet malore.